पहिलो मतदानबाट नयाँ पोप चयन भएन, सिस्टिन च्यापलबाट कालो धुवाँ निस्कियो
पहिलो मतदानबाट नयाँ पोप चयन भएन, सिस्टिन च्यापलबाट कालो धुवाँ निस्कियो
वेटिकन सिटी – मे ७, २०२५
वेटिकनको सिस्टिन च्यापलबाट कालो धुवाँ निस्किएसँगै, पहिलो मतदानमा नयाँ पोप चयन हुन नसकेको जनाइएको छ। पोप फ्रान्सिसको गत महिनाको निधनपछि नयाँ पोप चयन गर्न बोलाइएको पेपल कन्क्लेवको पहिलो दिन बुधबार सम्पन्न भएको थियो।
स्थानीय समयअनुसार साँझ ९ बजेतिर सिस्टिन च्यापलको चिम्नीबाट कालो धुवाँ निस्किएको थियो, जसले पहिलो दिनको मतदान असफल भएको संकेत दिएको हो।
वेटिकन न्यूजका अनुसार, करिब ४५,००० मानिसहरू सेंट पिटर स्क्वायरमा भेला भएर नयाँ पोपको घोषणा हुने आशामा प्रतिक्षा गरिरहेका थिए। प्रारम्भिक अनुमान अनुसार साँझ ७ बजेपछि घोषणा हुने अपेक्षा गरिएको थियो।
तान्जानियाबाट आएका डिकन निकोलस न्कोरोन्कोले वेटिकनको आधिकारिक समाचार पोर्टलसँग भने, “हाम्रो भूमिकाचाहिँ प्रार्थना गर्नु हो — अन्य मसीहीहरू, क्याथोलिकहरूसँग मिलेर पवित्र आत्माले सम्पूर्ण प्रक्रिया निर्देशित गरुन् भनेर।”
पोप फ्रान्सिसको ८८ वर्षको उमेरमा निधन भएपछि नयाँ रोमन क्याथोलिक धर्मगुरु चयन गर्न कन्क्लेव बोलाइएको हो। ७० देशहरूबाट आएका १३३ जना कार्डिनलहरू सिस्टिन च्यापलमा प्रवेश गरी, सम्पूर्ण प्रक्रिया गोप्य राख्ने शपथसहित मतदानमा सहभागी भएका छन्।
नयाँ पोप चयन भएपछिमात्र सेतो धुवाँ चिम्नीबाट निस्किन्छ, जुन विश्वव्यापी रूपमा नयाँ पोपको निर्वाचनको संकेत हो। इतिहासमा कन्क्लेव केही दिनदेखि लिएर केही महिना वा वर्षसम्मसमेत लम्बिएको छ। १२६८ देखि १२७१ सम्म चलेको कन्क्लेव तीन वर्षसम्म चलेको थियो, जुन अहिलेसम्मकै सबैभन्दा लामो मानिन्छ।
हालको कन्क्लेवमा पनि कार्डिनलहरूबाट दुई-तिहाइ मत प्राप्त नगरी कुनै उम्मेदवार पोप बन्न सक्दैनन्। अघिल्ला दुई कन्क्लेवमा पनि सफल निर्णयका लागि बहुवोट लागेका थिए।
“कन्क्लेव” शब्दको अर्थ हो ‘लक गरिएको कोठा’, जहाँ कार्डिनलहरू बाहिरी संसारबाट अलग भएर सिस्टिन च्यापलभित्र पोप चयन प्रक्रिया सम्पन्न गर्छन्।
नयाँ पोपका सम्भावित उम्मेदवारहरूमा कार्डिनल लुइस टाग्ले, कार्डिनल माटेओ जुप्पी, कार्डिनल रोबर्ट सराह, र कार्डिनल पिएत्रो पारोलिन को नाम चर्चामा छ।
