सेंट क्याथरिन मठको स्वामित्व मिसरलाई: इसाई समुदायको विश्वव्यापी विरोध
विश्वकै सबैभन्दा पुराना र निरन्तर सञ्चालनमा रहेको ग्रीक अर्थोडक्स मठहरूमध्ये एक, सेंट क्याथरिन मठको स्वामित्व मिसर सरकारलाई दिने मिसरी अदालतको निर्णयले अन्तर्राष्ट्रिय इसाई समुदायमा तीव्र विरोध र आक्रोशको लहर फैलाएको छ।
सिनाई पर्वतको फेदमा अवस्थित यो मठ, जुन यहूदी, इसाई र मुस्लिम तीनै धर्मका लागि पवित्र स्थल मानिन्छ, अब सरकारी स्वामित्वमा ल्याइने अदालतको आदेशले यसको ऐतिहासिक, धार्मिक तथा सांस्कृतिक अवस्थिति संकटमा परेको चिन्ता उठाइएको छ।
ग्रीसका परराष्ट्रमन्त्री जर्ज गेरापेत्रिटिसले मिसरी समकक्षी बद्र अब्देलअट्टीसँगको काइरो बैठकपछि मठको परम्परा र धार्मिक पहिचानलाई कायम राख्ने प्रतिबद्धता जनाइएको बताए पनि अदालतको निर्णयले स्थायीत्वबारे अन्योल उत्पन्न गरेको छ।
सन् ५४८–५६५ को बीचमा बाइजान्टिन सम्राट जस्टिनियन प्रथमद्वारा स्थापना गरिएको मठ युनेस्को विश्व सम्पदा सूचीमा सूचीकृत छ र यसको पुस्तकालयमा विश्वकै दुर्लभ इसाई पाण्डुलिपिहरू तथा बाइजान्टिन कला संग्रहित छन्।
ग्रीसका आर्चबिशप इरेनेमस द्वितीयले यस निर्णयलाई “धार्मिक स्वतन्त्रताको गम्भीर उल्लंघन” भन्दै कडा शब्दमा आलोचना गरे। उनले ग्रीक सरकारलाई मठको ऐतिहासिक अधिकार र धार्मिक अस्तित्व जोगाउन तत्काल हस्तक्षेप गर्न आग्रह गरेका छन्।
“यो निर्णय सधैंको लागि धार्मिक स्थलको रूपमा रहेको मठलाई संग्रहालयमा परिणत गर्ने खतरा बोकेको छ,” उनले भने।
अमेरिकास्थित इसाई अधिकारकर्मी समूह ‘इन डिफेन्स अफ क्रिस्चियन्स’ (IDC) ले पनि अदालतको आदेशप्रति चिन्ता व्यक्त गर्दै अमेरिकी सरकारलाई कूटनीतिक दबाबमार्फत निर्णय उल्ट्याउन आग्रह गरेको छ।
हालसम्म मिसरी राष्ट्रपतिले मठको धार्मिक स्थितिलाई सम्मान गर्ने प्रतिबद्धता जनाए तापनि अदालतको कानुनी निर्णयले ग्रीक अर्थोडक्स परम्परामा आधारित मठको स्वायत्तता र विश्व सम्पदाको हैसियतमा प्रत्यक्ष असर पार्ने चेतावनी इसाई नेताहरूले दिएका छन्।
